玩野？

剛才係yahoo新聞見到呢段新聞，莫非有人手多load錯左上去？
http://hk.news.yahoo.com/article/080719/4/79dm.html

毛線電視陳嘉銘報道
(明報)8月31日 星期日 05:10
【明報專訊】「而家我哋交俾喺現場嘅陳嘉銘。」

「唔該晒，劉芷欣。現場係事主嘅屋企，警方已經將現場解封；事發係因為事主嘅媽媽，過去一星期多次聯絡事主，都聯絡唔到而報警。警方到場後發現屋內凌亂，地下亦佈滿關於奧運 嘅報紙同雜誌。事主留低一封標題為《人生苦短，奧運唔長》嘅信，話唔想留喺一個好難再有『北京 奧運』嘅世界；封信被警方懷疑係遺書，但係就發現唔倒有人死嘅迹象，所以警方暫列作失蹤案處理。失蹤事主與本台記者同名同姓，亦曾為明報主持《棟篤溫文秀》嘅專欄。」

「陳嘉銘，事件似乎引起多方面嘅關注喎，點解呢？」

「係呀！因為事主似乎就係患上咗，最近唔少專家討論過嘅『奧運後抑鬱症 』，簡稱『抑奧症』，係繼『抑躁症』之後，心理學界非常重視嘅精神病殺手。患者喺奧運完結之後，唔能夠重新投入原本嘅生活；有患者更因為中國突然變得太好，比如空氣清新咗，市民又多咗禮貌，而壓抑自己知道奧運完結，以為奧運真係可以搞足百年。心理專家提醒市民，如果未曾試過發夢夢見奧運，咁即係壓抑到連夢都唔敢發，係『抑奧症』嘅先兆。另外如果見倒郭晶晶 表演而想起霍啟剛，即係話壓抑到睇跳水都唔能夠集中，應該係病得好嚴重。」

「既然個病咁嚴重，專家有乜嘢建議呢？」

「專家話，奧運記者及主持人，係『抑奧症』高危人士。專家建議，高危人士同市民一樣，都可以多啲搵同奧運冇關嘅人傾吓計，紓緩心情；但係問題反而係，奧運好似同人人都有關。而家唯一可以做嘅，就係希望傳媒繼續炒作劉翔 、林丹、郭晶晶或者何雯娜嘅事，為患病嘅市民提供心理治療。我嘅報道到呢度，將時間交俾北京嘅方東昇，同大家講吓劉翔遇到外星人嘅經過。」